新冠疫情持續近3年，雖然政府逐步放寬防疫措施，但中國媒體報道，最近多咗人有「幻陽症」，係經常懷疑自己「中招」、一日做幾次快測，仲有人因為咁坐唔安、食唔落。來
中國防疫鬆綁，對有啲民眾嚟講原來未必係好事。因為新冠數字與日俱增，愈來愈多人出現「幻陽症」。多間中國媒體報道，唔少人成日懷疑自己「中招」，忍唔住一日做好多次快測確認，又寢食難安、情緒不穩。
有人話自己幾日前接觸過一個確診者後，就開始出現症狀，周圍問人「我會不會也中招了呀，我感覺很不舒服」。即使事後核酸、抗原檢測係陰性，佢都仲係唔放心，覺得自己「中咗」，仲因為唔想感染屋企人、朋友，自行隔離，搬咗出去住。
專家話呢啲個案係中國內地多不勝數，全部都係焦慮嘅表現，建議民眾用積極合理嘅方法應對，例如維持規律作息，提高免疫力，關注權威平台嘅科學信息。又話閒時可以冥想放鬆吓、穩定情緒。
